Xhamitë në qytete të ndryshme të Kosovës shpeshherë janë cak i hajnave, të cilët ua vënë syrin gjërave me vlerë. Cak i hajnave janë më së shumti arkat e ndihmave e kasafortat e mbushura me para, por në raste tjera edhe gjësende tjera materiale, raporton Gazeta Prishtina Sot.
Një vjedhje e rëndë ka ndodhur në xhaminë në lagjen Dardania në Gjilan, ku persona ende të paidentifikuar kanë hyrë me forcë brenda objektit fetar.
Burimet e Gazetës kanë bërë me dije se rasti është denoncuar nga arkëtari i xhamisë, i cili ka vërejtur se mungon një pajisje elektronike për kamerat e sigurisë dhe se dera është hapur me forcë.
Njësitë policore kanë dalë në vendin e ngjarjes për të kryer ekzaminimet e nevojshme që ndihmojnë në zbardhjen e rrethanave të rastit, teksa janë marrë të gjitha veprimet hetimore që çojnë në identifikimin e të dyshuarit.
Me urdhër të prokurorit, rasti është cilësuar ‘Vjedhje e rëndë’, ndërsa veprimet tjera ligjore do merren posa të kapet i dyshuari./Prishtina Sot/