Sezoni i gripit të Hemisferës Jugore po mbyllet dhe të dhënat e reja tregojnë se vaksina e gripit të këtij viti ishte 34.5% efektive në mbajtjen e njerëzve që u infektuan me grip nga nevoja për kujdes spitalor.
Shumica (68.3%) e të dërguarve në spital kishin llojin A(H3N2) të gripit, sipas raportit nga qendrat e SHBA-së për kontrollin dhe parandalimin e sëmundjeve (CDC), shkruan burimi Health Day përcjell gazeta Shneta.
Ulja e rrezikut të shtrimit në spital ishte edhe më e madhe për njerëzit me sëmundje kronike, të cilët janë gjithmonë në rrezik më të lartë për grip të rëndë.
Midis këtij grupi, marrja e vaksinës së gripit uli shanset e tyre për shtrimin në spital me gati 59%, krahasuar me ata që nuk u imunizuan, thanë studiuesit.
E gjithë kjo “mbështet rekomandimin e CDC-së dhe OBSH-së që të gjithë personat e kualifikuar të moshës [në ose mbi moshën] gjashtë muajshe duhet të vaksinohen kundër gripit”, tha Erica Zeno, nga Departamenti i imunizimit dhe sëmundjeve të frymëmarrjes të CDC.
Gripi që është aq i rëndë sa kërkon shtrimin në spital ndonjëherë mund të çojë në vdekje. Autorët e raportit vunë në dukje se në të gjithë SHBA-në, gripi merr jetën e deri në 71,700 njerëzve çdo vit.
Gjetjet u botuan, më 3 tetor në raportin javor të “CDC, Morbidity and Mortality Weekly Report”.
“Vaksinimi mbetet një nga masat më efektive për të parandaluar komplikimet e lidhura me gripin, duke përfshirë vdekjen”, tha ekipi i Zeno-s.