Kroacia – shtet anëtar i NATO-s – ka marrë gjashtë avionë luftarakë francezë Rafale.
Më 25 prill 2024 u zhvillua një ceremoni mirëseardhjeje në kazermën “Kolonel Marko Živković” në Velika Goricë, ndërsa Forcat Ajrore Kroate morën gjashtë të parat nga gjithsej 12 avionë luftarakë francezë Rafale që do të operojnë në skuadrën e 191-të luftarake të Krahut të 91-të, ka njoftuar NATO në një komunikatë.
Pilotët e Forcave Ajrore Kroate fluturuan me aeroplanët Rafale nga Franca, ku zhvillohet trajnimi dhe edukimi i ekuipazheve ajrore dhe tokësore të Kroacisë.
“Përgëzoj të gjithë ata që morën pjesë në prokurimin, i cili përfaqëson investimin më të madh të Forcave të Armatosura të Republikës së Kroacisë që nga pavarësia e vendit tonë”, tha kryetari i Parlamentit kroat, Gordan Jandrokoviq duke pranuar përfitimin që ka popullata në sigurinë e hapësirës ajrore.
“Kjo është një ditë historike për Kroacinë! Gjashtë avionët e parë luftarakë Rafale ruajnë nga sot qiejt kroatë. Siguria e vendit tonë është ngritur në një nivel që nuk ka qenë kurrë më parë. Jemi krenarë që realizojmë investimin më të madh në kapacitetet e ushtrisë kroate”, tha kryeministri i Republikës së Kroacisë, Andrej Plenkoviq.
“Në avionët Rafale po fitojmë fuqinë e parandalimit, po forcojmë partneritetin tonë strategjik me Francën, i jemi bashkuar familjes Dassault, e cila ndryshon ndjeshëm rolin tonë në NATO dhe BE”, tha kryeministri.
Rafale është një aeroplan i gjithanshëm me shumë role, i aftë për të kryer të gjitha misionet e caktuara për një avion luftarak: parandalim bërthamor, depërtim dhe sulm në tokë në çdo mot, sulm në det, epërsi mbrojtëse dhe ajrore, ndërhyrje me rreze të gjatë, furnizim me karburant ajër-ajër, zbulim taktik dhe strategjik. Aftësia moderne e fituar forcon jo vetëm Forcat Ajrore, por edhe Forcat Tokësore dhe Detare.
Avionët luftarakë Rafale përfundimisht do të marrin kontrollin e policisë ajrore në qiellin kroat. Mbrojtja e hapësirës ajrore kroate është e integruar në marrëveshjet e NATO-s dhe mbikëqyret nga Komanda Ajrore Aleate në Ramstein, Gjermani dhe Qendra Jugore e Operacioneve Ajrore të Kombinuara të Aleancës në Torrejon, Spanjë.
Këta aeroplanë kishte synuar t’i blejë edhe Serbia, por ishte kushtëzuar nga Kroacia për shkak të politikave në Serbi.