I dyshuari për vrasjen e 30-vjeçares, Liridona Ademaj, Naim Murseli, do të vazhdojë edhe sot dëshminë e tij par Prokurorisë Themelore në Prishtinë, raporton Gazeta Sinjali.
Këtë e ka konfirmuar mbrojtja e Murselit, e cila ka shtuar se nesër dëshminë e tij do ta vazhdojë edhe i dyshuari tjetër, Kushtrim Kokalla.
Ndryshe, Murseli është dërguar edhe sot në Prokurori në masa të larta sigurie. I njëjti kishte dhënë dëshminë e tij edhe më 24 janar.
Gjykata Themelore në Prishtinë në dhjetor të vitit 2023, ua ka vazhduar edhe për dy muaj paraburgimin Naim Murselit, Granit Plavës dhe Kushtrim Kokallës, të cilët dyshohet se janë përfshirë në vrasjen e planifikuar të Liridonës.
Ndryshe, mbrëmjen e 29 nëntorit, i gjithë vendi u trondit nga ngjarja makabre ku viktimë ishte 30-vjeçarja.
Rasti fillimisht u cilësua ‘Grabitje e armatosur me pasojë vdekjen’, pasi të dyshuarit, Granit Plava, Kushtrim Kokalla dhe bashkëshorti i së ndjerës, Naim Murseli, kishin inskenuar ngjarjen që të paraqitet si grabitje e armatosur.
Të dyshuarit janë dërguar në paraburgim në Burgun e Sigurisë së Lartë në Dyz.
Naim Murseli ngarkohet me veprën penale ‘Vrasje e rëndë në bashkëkryerje’.
Granit Plava ngarkohet me veprat penale ‘Vrasje e rëndë’ dhe ‘Mbajtje në pronësi, kontroll ose posedim të paautorizuar të armës’.
Kushtrim Kokalla ngarkohet me veprën penale ‘Marrëveshje për të kryer veprën penale ‘Vrasje e rëndë’’.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.