Edhe pse rastet e lëndimeve të punëtorëve në vendet e punës nuk janë të rralla, kushtet nëpër kompanitë private po vazhdojnë të jenë të këqija, e ku prej të cilave po pësojnë më së shumti punëtorët.
Një rast i tillë ka ndodhur të hënën në objektin ‘Ariani’ në Mitrovicë, ku një punëtor dyshohet se nga pakujdesia ka rënë nga kati i dytë i ndërtesës.
Siç mëson gazeta, viktima është një 21-vjeçar, i cili ka pësuar lëndime të rënda trupore (frakturë në dy duart) dhe për pasojë është dërguar me urgjencë në QKUK.
Sipas informacioneve të para, i riu është jashtë rrezikut për jetë dhe po vazhdon trajtimin mjekësor.
Lidhur me rastin është njoftuar edhe Policia e Kosovës, me ç’rast janë kryer ekzaminimet e nevojshme në vendin e ngjarjes.
Me urdhër të Prokurorit të Shtetit është iniciuar hetimi për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.