Prokuroria Speciale e Republikës së Kosovës, sot ka mbajtur një konferencë për media, ku janë shpalosur informacione sa i përket ngritjes së aktakuzave për krimet e luftës. Ndër të tjera, prokurori Ilir Morina, ka deklaruar se për masakrën e Dubravës objekt hetimi janë 88 persona, të cilët po hetohen qe një kohë të gjatë.
Morina tha se aktualisht një person i përfshirë në këtë rast është në paraburgim.
“Ka filluar shqyrtimi gjyqësor për rastin e masakrës së Dubravës. Nën hetim janë 88 të pandehur. Ky hetim ka filluar që një kohë të gjatë pasi ishte lëndë e EULEX-it, një të pandehur e kemi në paraburgim, është sfidë të kryhet një hetim lufte për dy vjet, por këto janë mundësitë ligjore. Me ligj paraburgimi është 2 muaj. Për të pandehurit e tjerë vazhdojnë hetimet, dhe jemi duke mbledhur provat. Në momentin që do të jemi gati do të procedojmë edhe ndaj këtyre të pandehurve”, ka thënë Morina./Prishtina Sot/