Drejtoria për Hetimin e Krimit të Organizuar, e asistuar nga njësitet relevante policore, ka zhvilluar të enjten një operacion të gjerë policor në rajonin e Pejës dhe Prishtinës, që rezultoi me disa të arrestuar, si anëtarë të një grupi kriminal që dyshohet se merrej me fajde. Të dyshuarit janë përfshirë edhe në veprat penale “Detyrimi” e “Rrëmbim” dhe tashmë është lëshuar urdhër për ndalimin e tyre, raporton Gazeta Sinjali.
Sinjali raportoi mbrëmë ekskluzivisht se njëri nga të arrestuarit është Idriz Hajrizi, ndërsa në mesin e të arrestuarve, burimet e Sinjalit thonë se janë arrestuar edhe një grua dhe djali i saj. Personat e tjerë të arrestuar janë Valbona Pakashtica, Irfan Pakashtica dhe Anes Pakashtica .
Sipas informacioneve të para, grupi kriminal ka kërkuar në total rreth 250 mijë euro, për më pak se 150 mijë euro që janë dhënë me fajde.
Prokurori i rastit, Ersan Qavolli, ka deklaruar për Sinjalin se sot do të ushtohet kërkesa për caktimin e masës së sigurisë ndaj katër personave që janë dërguar në mbajtje.
Arrestimi i Hajrizit dhe disa të dyshuarve të tjerë u realizua në një kafeteri në Pejë, ndërsa bastisjet u zhvilluan në disa lokacione të ndryshme.
Policia e Kosovës ka publikuar video nga operacioni, e po ashtu edhe Sinjali ka siguruar pamje kur pjesëtarët e FIT-it arrestojnë disa nga të dyshuarit.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.