Nuk janë të rralla rastet kur qytetarët marrin vetura nga autosallonet dhe shkelin marrëveshjet që bëjnë me bizneset për shfrytëzimin e tyre. Shpesh ato automjete nuk kthehen në kohë, shiten, ose ‘zhduken’, çka i detyron pronarët e kompanive të kërkojnë ndihmë nga Policia, raporton Gazeta Prishtina Sot.
Kështu ka ndodhur edhe në sallonin e automjeteve “Discrict” në Veternik, ku një 40-vjeçare po dyshohet se kishte marrë me një veturë për ta testuar para se ta blejë dhe më pas nuk e ka kthyer. Gazeta ka mësuar ekskluzivisht se personi i arrestuar për këtë rast është Eva Kristofova.
Burimet nga Prokuroria kanë bërë me dije se përballë kësaj situate, pronari i kompanisë është detyruar që të denoncojë rastin në Polici, ku ka deklaruar se e dyshuara e ka marrë një veturë të tipit Audi.Si rezultat i denoncimit, Policia ka dalë në vendin e ngjarjes dhe janë marrë informacionet e para për rastin.
Me urdhër të Prokurorit të Shtetit, e dyshuara është arrestuar dhe dërguar në mbajtje për 48 orë për veprën penale “Mashtrimi”.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.