Korporata Energjetike e Kosovës e ka konfirmuar kërkesën që e ka dërguar për ngritjen e çmimit të shitjes së energjisë elektrike, duke dhënë edhe argumente se pse duhet të ndodh kjo, por se thekson se nuk kanë marrë ndonjë përgjigje lidhur me këtë kërkesë.
Skënder Bucolli nga zyra për marrëdhënie me publikun e KEK-ut, ka thënë për KosovaPress se e ka dërguar kërkesën për rishikim të çmimeve por se nuk ka informata që është aprovuar rritja e çmimit sipas kërkesës së tyre.
“Marrëveshja e fundit bilaterale me NR 6005 ndërmjet KEK dhe KESCO/KEDS është lidhur në vitin 2023 për periudhën kohore 01 Prill 2023 deri më 31 Mars 2024, sipas kësaj marrëveshje çmimi aktual me të cilin KEK e furnizon KESCO për shërbimin universal është 29.5€, kurse çmimi për mbulimin e humbjeve ne distribucion pra për KEDS është 36.00€. Lidhur me këtë, KEK ka dërguar kërkesën për rishikim të çmimeve tek KESCO/KEDS, propozimi i KEK për çmimet e reja ka qenë 31.50€ për KESCO dhe 39.10€ për KEDS. Megjithatë, KEK nuk ka informata që është aprovuar rritja e çmimit sipas kërkesës tone, për më tepër gjatë shqyrtimit tarifor nga ZRRE bazë për kalkulimin e të hyrave për KESCO/KEDS është marrë çmimi aktual me të cilin furnizohen”, ka thënë ai në një përgjigje për KosovaPress.
Bucolli tha se çmimet e energjisë elektrike nga KEK, nuk kanë pësuar ndryshime që nga viti 2019 dhe se sipas tij arsyet kanë qenë fillimisht pandemia e më pastaj kriza energjetike.
“Edhe pse çmimet e energjisë elektrike të KEK-ut nuk kanë pësuar ndryshime, gjithsesi tarifat apo çmimet e KOSTT për Operim të Tregut dhe Operim të Sistemit kanë pësuar rritje vazhdimisht dhe kjo paraqet kosto direkte për KEK-un. Duke u bazuar në faktin që kostot direkte të KEK-ut vazhdimisht janë rritur por edhe kostot tjera janë rritur dukshëm krahasuar me vitet paraprake dhe për këtë dëshmon edhe fakti që vendi është ballafaquar me një inflacion prej rreth 5.4% gjatë vitit 2023. Për më tepër, qëllimi primar për rishikimin e çmimeve të energjisë elektrike janë mbulimi i të gjitha kostove dhe në anën tjetër sigurimi i mjeteve të mjaftueshme për të bërë investimet e nevojshme kapitale të cilat do të ndikojnë në stabilitetin e njësive gjeneruese, atëherë mos reflektimi i propozimit të KEK-ut mund të shkaktojë vonesa në realizimin e investimeve kapitale por edhe mundësinë e operimit me humbje”, theksoi Bucolli.
Ndryshe, Zyra e Rregullatorit për Energji (ZRRE) ka konfirmuar për KosovaPress, se nuk do të ketë rritje të çmimit të energjisë elektrike. Në një përgjigje me shkrim, ata thonë se në vlerësimin e kostove me shumicë për vitin 2024, ZRRE ka marrë në konsideratë çmimet aktuale, pasi siç thonë “nuk kanë pranuar ndonjë dëshmi tjetër nga palët të cilat i nënshtrohen rregullimit për rishikimin e çmimit të blerjeve të energjisë nga KEK-u, andaj nuk do të ketë ndryshim të çmimeve”.