Presidenti i FIFA-s, Gianni Infantino, ka njoftuar se ka mirëpritur Presidenten e Republikës së Kosovës, Vjosa Osmani në zyrën e FIFA-s në Paris.
Në llogarinë e tij në Instagram ai ka postuar fotografi nga takimi në fjalë, dhe shprehet se edhe më parë ka pasur nderin ta takojë Dr. Osmanin gjatë vizitës së tij në vendin e saj të bukur në vitin 2022, dhe se kjo ishte një mundësi e shkëlqyer për të vazhduar ato diskutime.
“Ne folëm sesi futbolli mund t’i bashkojë njerëzit dhe diskutuam plane për të vazhduar përmirësimin e infrastrukturës sportive në Kosovë, e cila do të mbështesë lojtarët e rinj të talentuar të vendit në realizimin e potencialit të tyre”.
“Federata e Futbollit të Kosovës e ka shfrytëzuar shkëlqyeshëm programin FIFA Forward dhe Dr. Osmani e kupton qartë rëndësinë e mbështetjes së qeverisë në zhvillimin e futbollit për t’u ofruar më shumë mundësi vajzave dhe djemve për të luajtur sportin tonë të mrekullueshëm”, shkroi mes tjerash Infantino në postimin e tij.