Posedimi dhe përdorimi i armëve të zjarrit është shndërruar në dukuri negative në vendin tonë, pasi vazhdimisht hasen persona të cilët mbajnë me vete armë ilegale. Për pasojë, shumë shpesh ndodhin incidente, madje edhe aksidentale.
Një rast i tillë ka ndodhur mbrëmë në Ferizaj, ku një person dyshohet se ka plagosur veten aksidentalisht me armë zjarri.
Burimet e Gazetës brenda Emergjencës kanë bërë me dije se viktima fillimisht është trajtuar në Spitalin e Ferizajt, e më pas është transferuar në QKUK.
Ekipi mjekësor ka intervenuar menjëherë dhe pas kontrolleve është konstatuar se i njëjti ndodhet jashtë rrezikut për jetë.
Lidhur me rastin është njoftuar edhe Policia e Kosovës, të cilët kanë dalë në vendin e ngjarjes për të kryer ekzaminimet e nevojshme.
Në cilësinë e provave materiale është konfiskuar arma që dyshohet se u përdor në rast.