Pas një kohe të gjatë në arrati, ka rënë mbrëmë në prangat e Policisë Ilvaim Zimmerli Gashi, rreth 45-vjeçar nga fshati Sferkë i Klinës, i shpallur në kërkim para disa vitesh nga Policia e Kosovës, nën dyshimet për mashtrim, raporton ekskluzivisht Gazeta Sinjali.
Siç raportoi Gazeta, Gashi, është kapur në rrugën “Willaim Walker” në Prizren, ku u prangos dhe u shoqërua në Polici për procedurat e mëtejme.
Në momentin e ndalimit nga Policia, siç zbulon Gazeta, Gashi ka tentuar t’i mashtrojë ata duke ua prezantuar dokumentin e identifikimit të vëllait të tij, por që ka dështuar – pasi menjëherë është kapur nga zyrtarët policorë.
Këta të fundit, me urdhër të Prokurorit të Shtetit e kanë bastisur menjëherë banesën e tij, ku edhe i kanë gjetur dokumentet e tij personale.
Ndryshe, më 9 korrik të vitit 2021, Policia kërkonte ndihmë për arrestimin e tij, nën dyshimin se ka kryer veprën penale “Mashtrimi”.
Por, dosja e Zimmerli Gashit është e pasur edhe me raste të tjera, pasi ndaj tij kanë qenë të lëshuara 5 urdhëresa aktive, ai kërkohej nga Prishtina, Prizreni dhe Klina, shkruan Gazeta Sinjali.
Gashi do të dërgohet në burg, për ta vuajtur dënimin prej 1 vit e katër muaj burgim.
Kujtojmë se Gashi kishte dy adresa vendbanimi, në Klinë dhe në Prizren.