Rreth 70 aksidente në trafik ndodhën veç dje në Kosovë, ku njëri prej tyre përfundoi me fatalitet. Në Lluga të Podujevës, një person u godit nga një veturë dhe për pasojë nuk arriti t’iu bëjë ballë plagëve. Shoferi i dyshuar është arrestuar dhe tashmë ndodhet në mbajtje, raporton Gazeta Sinjali.
Gazeta ka raportuar sot ekskluzivisht se i dyshuari për këtë aksident është Imer Statovci, rreth 22-vjeçar.
Siç ka zbuluar Gazeta ai është pjesëtar i Forcës së Sigurisë së Kosovë.
Ai po dyshohet se me automjetin e tij, teksa ishte duke lëvizur, nga pakujdesia e ka goditur viktimën, i cili ishte në biçikletë.
Për pasojë, 68-vjeçari Mehdi Konushevci, pësoi lëndime të rënda trupore dhe vdiq në vendin e ngjarjes.
Vdekjen e tij e ka konstatuar ekipi mjekësor që intervenoi, ndërsa trupi i pajetë është dërguar në IML për obduksion.Ndaj shoferit të dyshuar, pas përfundimit të procedurave policore, Prokurori i Shtetit ka urdhëruar masën e ndalimit policor.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.