Dëshmitari i 46-të në gjykimin ndaj ish-krerëve të UÇK-së do të dëshmojë në Gjykatën Speciale, për “rrëmbim të anëtarëve të familjes”, që sipas tij ka ndodhur në zonën e Rahovecit.
Kështu thuhet në njoftimin e Zyrës së Prokurorit të Specializuar. (ZPS).
“ZPS-ja thirri dëshmitarin e 46-të në mëngjes në gjykimin Thaçi dhe të tjerët. Dëshmitari dëshmon me pseudonimin Ë00498, por pa ndryshim të fytyrës dhe zërit. Sipas përmbledhjes që ZPS-ja lexoi në sallën e gjyqit, ky dëshmitar do të dëshmojë për rrëmbimin e anëtarëve të familjes në zonën e Rahovecit”.
Para dëshmisë së tij, trupi gjykues ka lëshuar një urdhër për avokatin Luka Mishetiq që të dorëzojë listën e përditësuar të anëtarëve të ekipit mbrojtës të Thaçit deri më datën 11 mars.
“Trupi Gjykues gjithashtu informoi palët për një seancë shtesë të nesërmen (21 shkurt), e cila do të mbahet pas përfundimit të seancës së rregullt. Sipas njoftimit të Trupit Gjykues sot, kjo seancë do t’i kushtohet caktimit të datave dhe planifikimit për këto procedura”.