Biznesmeni nga Prizreni, Granit Paqarizi, me të kaluar krimianle që përfundoi në ndalim policor nën dyshimet për veprën penale “Dhunimi” ka shpëtuar nga paraburgimi. Edhe pse Prokuroria Themelore në Prishtinë e kërkoi këtë masë sigurie, Gjykata e refuzoi dhe caktoi një masë alternative.
Lajmin e kanë konfirmuar nga Gjykata Themelore në Prishtinë në një përgjigje për Sinjalin, ku njoftuan se ndaj Paqarizi është dërguar në arrest shtëpiak.
“Ju njoftojmë se Gjykata Themelore në Prishtinë – Departamenti për Krime të Rënda ka refuzuar kërkesën e Prokurorisë Themelore në Prishtinë – Departamenti për Krime të Rënda për caktimin e masës së paraburgimit ndaj të pandehurit G.P, ashtu që ndaj të njëjtit është caktuar masa e arrestit shtëpiak në kohëzgjatje prej një (1) muaji, e cila masë do të zgjasë nga 21.08.2024 deri më datë 20.09.2024.”, thuhet në përgjigjen e gjykatës, pa dhënë detaje mbi këtë vendim.
Paqarizi u arrestua dhe u ndalua për veprën penale “Dhunimi”, që dyshohet se e ka kryer para disa ditësh në një motel në Fushë Kosovë.
Gazeta raportoi ekskluzivisht për arrestimin dhe ndalimin e Paqarizit.
Pasi u lirua, ai doli me një postim në Facebook, duke mos treguar se i është caktuar masa e arrestit shtëpiak, por duke lëshuar akuza se gjoja rasti ka të bëjë me shantazh dhe është i montuar.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.