Çmimet e naftës ranë për sesionin e tretë radhazi të mërkurën për shkak të pritjeve që Rezerva Federale e ShBA-së mund t’i mbajë në nivel të lartë shkallët e interesit për kohë më të gjatë për shkak të inflacionit të vazhdueshëm, potencialisht duke e prekur përdorimin e naftës në shtetin që shpenzon më së shumti lëndë të tillë në botë.
Çmimi i një fuçie me naftë të papërpunuar në bursën “Brent” ra për 60 centë ose 0,7 për qind – 82,28 dollarë. Ndërkohë, çmimi i një fuçie naftë të papërpunuar në bursën WTI ra për 64 centë ose 0,8 për qind – 78,02 dollarë.
Të martën, çmimet e naftës ranë për rreth 1 për qind, raporton agjencia “Reuters”.
Politikëbërësit në Rezervën Federale thanë se banka qendrore e ShBA-së duhet të presë edhe disa muaj për t’u siguruar që inflacioni vërtet është kthyer në binarë drejt cakut prej 2 për qind para se të ulen shkallët e interesit.
Kostot më të larta të huamarrjes mund ta ngadalësojnë rritjen ekonomike dhe mund t’i bëjnë presion kërkesës për karburante.
Rezervat e naftës dhe benzinës së papërpunuar në ShBA shënuan rritje javën e kaluar, ndërsa distilimet pësuan rënie, sipas burimeve tregtare që cituan shifra të Institutit Amerikan të Karburanteve të martën.