Sead Hamziç, hetues në stacionin policor të Pejës, është denoncuar në Inspektoratin Policor të Kosovës (IPK) për një veprim skandaloz që ka bërë.
Eldin Muminoviç (“miku” i policit Hamziç), Erhad Muminoviç dhe Almir Memiç janë arrestuar për veprën penale “Mbajtja në pronësi, kontroll ose posedim të paautorizuar të armëve” ku nga një aheng në një restorant në Pejë janë konfiskuar dy armë zjarri dhe në vendngjarje janë gjetur dhe sekuestruar 46 gëzhoja të pistoletës.
Duke iu referuar një ankese të dorëzuar nga një zyrtar i lartë policor, të cilën e ka parë Insajderi, aty pretendohet se Hamziç kishte marrë Eldin Muminoviç, një nga tre të arrestuarit për armëmbajtje pa leje në një aheng nga qendra e ndalimit për ta rikthyer në dasmë për 30 minuta.
Për këtë rast, Gazeta Insajderi ka provuar të kontaktojë kryeshefin e Inspektoratit Policor të Kosovës (IPK), Kushtrim Hodaj, për ta pyetur nëse e kanë pranuar rastin dhe se çfarë masash pritet të ndërmarrë IPK’ja, mirëpo deri në momentin e publikimit të këtij artikulli s’ka marrë ndonjë përgjigje.
Sipas ankesës, krejt këto polici Hamziç i ka bërë me “izën” e Prokurorit kujdestar, Dorjan Juniku.
“Seadi me tha po e dërgoj ne darsem 30 minuta dhe e kthej prap se kam fol me prokurorin dhe me ka thëne mos me humb kohe me shumë”, thuhet në ankesën që e ka parë Insajderi.
“…ndërkohe kam telefonuar dhe Prokurorin kujdestar Dorjan Juniku te cilit i kam thënë se a je ne njohuri dhe a ke leshur ndonjë vendim tjetër për lirimin e te dyshuarit sepse Seadi e ka nxjerr pa dijeninë time te dyshuarin nga ndalimi policor dhe po thirret ne emrin tënd qe i ke thënë me dërgua ne darsem 30 min, Prokurori me ka thëne se Seadit i kam thëne qe ju i dini procedurat tuaja dhe nëse keni mundësi mundeni me dergu ne dasmë 30 minuta dhe e ktheni prap”, vijon ankesa.
Pas një telefonate që ankuesi e kishte bërë me eprorët menaxhues të Policisë në Pejë, polici Hamziç, siç pretendohet në ankesë, e ka kthyer të dyshuarin menjëherë në mbajtje.