Shoqata e Prodhuesve të Qumështit të Kosovës (SHPQK), ditëve të fundit ka pranuar një numër të madh ankesash nga fermerët, për shkak të vonesave në pagesat e subvencioneve nga ana e Ministrisë së Bujqësisë!
Andaj Shoqata e Prodhuesve të Qumështit i është drejtuar ministrit Faton Peci nga i cili ka kërkuar përshpejtim të ekzekutimit të pagesave të subvencioneve për fermerët.
Kërkesa e proidhuesve të qumështit drejtuar ministrit Peci:
Duke u bazuar nga ankesat e lartcekura, ne si shoqatë e fermerëve, prodhues të qumështit, ju drejtohemi me këtë kërkesë, duke ju lutur që, si institucion vendimmarrës që të përdorni autoritetin tuaj për të përshpejtuar ekzekutimin e pagesave të subvencioneve tek fermerët.
I nderuar ministër, siç jeni edhe ju në dijeni, këto subvencione janë një bazë e rëndësishme për sigurimin e qëndrueshmërisë financiare të fermerëve të cilët përballen me shpenzime të mëdha për prodhimin bujqësor dhe blegtoral dhe janë mjete të domosdoshme për të garantuar që fermerët të mund të vazhdojnë aktivitetet e tyre pa ndërprerje dhe në kohë!
Vonesat që janë duke ndodhur, janë duke i vendosur fermerët në situata të pafavorshme, ku shumë prej tyre po përballen me vështirësi, mungesë mjetesh financiare, borxhe dhe pa mundësi për të blerë me kohë inputet e nevojshme për mbjellje vjeshtore për të mbuluar shpenzimet e imputeve, si: farërat, plehrat, karburantin dhe shpenzimet tjera të cilat janë rritur ndjeshëm për shkak të inflacionit të lartë. Prandaj, vonesa në pagesë të subvencioneve po ndikon direkt në planifikimin e tyre sezonal dhe si rrjedhojë do të ndikojë negativisht në prodhimin final bujqësor.
Prandaj, ju bëjmë thirrje që të merrni masa të menjëhershme në përshpejtimin e pagesave të subvencioneve, duke siguruar që fermerët të marrin mbështetjen e nevojshme në kohë dhe të kenë mundësinë të përballojnë detyrimet e tyre financiare.
Ju falënderojmë për vëmendjen dhe mbesim me shpresë se kërkesa jonë dhe pagesa e subvencioneve të realizohet sa më parë!
Me respekt, Shoqata e Prodhuesve të Qumështit e Kosovës.