Ministri i Financave, Hekuran Murati ka thënë se investimet kapitale për vitin 2023 kanë shënuar rritje prej 33 për qind, e që siç thotë ai është niveli më i lartë ndonjëherë, shkruan Prishtina Sot.
Në një postim të bërë në Facebook, ku dhe ka shfaqur një grafikon, Ministri Murati thotë se viti 2023 është përmbyllur me rreth 561 milionë investime kapitale buxhetore të realizuara.
“Kjo shënon një rimëkëmbje të theksuar të investimeve kapitale krahasuar me vitin paraprak, e njëkohësisht edhe shifrën më të lartë të investimeve kapitale të realizuar ndonjëherë”, ka shkruar mes tjerash ai.
Postimi i plotë:
Investimet kapitale në 2023 shënojnë rritje prej 33%, niveli më i lartë ndonjëherë
Raporti vjetor tregon se viti 2023 është përmbyllur me rreth 
561 milionë euro investime kapitale buxhetore të realizuara.
Kjo shënon një rimëkëmbje të theksuar të investimeve kapitale krahasuar me vitin paraprak, e njëkohësisht edhe shifrën më të lartë të investimeve kapitale të realizuar ndonjëherë.
Pas viteve të pandemisë 2020-2021, dhe vitit 2022 kur punëkryesit kishin probleme me koston e materialeve ndërtimore, duket se më në fund viti 2023 ka rikthyer investimet kapitale në binarët e duhur.
Lajmi akoma më i mirë është se trendi i vitit 2024 deri më tani tregon për performancë edhe më të mirë sesa viti 2023 dhe pritet që sivjet të kemi “boom” të investimeve kapitale.
Ky rezultat është i mirëpritur pas shumë e shumë punëve në rregullimin e problemeve që ishin trashëguar, me projekte të padizajnuara si duhet dhe pa kryer obligimet e shpronësimit, probleme të cilat për shumicën e projekteve tashmë janë zgjidhur.
PS. Deri në vitin 2019, shumica dërrmuese e investimeve kapitale, 150-200 milionë euro në vit, kanë qenë pagesa për vetëm një projekt, atë të autostradës. Prandaj nëse merret edhe ky fakt parasysh, i bie që shuma e investuar për shkolla, spitale, kulturë, sport, siguri e ushtri, ka qenë shumë më e vogël sesa që mund të mendohet në shikim të parë.