Një incident ka ndodhur mbrëmë rreth orës 21:00 në lagjen “Bregu i Diellit”, ku ka ndodhur një përleshje e cila ka përfunduar edhe me përdorim të armës së zjarrit, raporton Sinjali.
Gazeta ka raportuar se rasti ka ndodhur në rrugën “Rrahim Beqiri”, te lokali “Gold Club” i cili është rrethuar me shirita nga Policia.
Ekipet mjekësore mbrëmë janë parë duke u futur në lokalin ku dyshohet se ka ndodhur ky rast. Të dyshuarit janë larguar nga vendi i ngjarjes, mirëpo Policia mbrëmë ka bërë të ditur se ata janë identifikuar dhe tashmë po kërkohen.
Policia ka dhënë detaje të reja në lidhje më këtë rast, ku thuhet se dy persona kanë mbetur të lënduar si pasojë e përleshjes.
“Raportohet se dy të dyshuar të panjohur kanë shtënë me armë zjarri në drejtim të një lokali dhe janë larguar në drejtim të panjohur. Në vendin e ngjarjes kanë dal njësitë policore ku kanë takuar dy viktimat meshkuj kosovarë të cilët kanë pësuar lëndime trupore si pasojë e përleshjes fizike”, shkruhet në njoftim.
Ndërkaq, hetimet në lidhje me këtë rast tashmë kanë filluar.