Pronat e sekuestruara të Millan Radoiçiqit, do t’i jepen në shfrytëzim Ministrisë së Brendshme të Kosovës (MPB), përkatësisht Policisë së Kosovës.
Kështu u mor vendimi sot në mbledhjen e qeverisë së Kosovës me ndryshim-plotësimet e një udhëzimi administrativ.Radoiçiqin, Kosova e kërkon si përgjegjës për organizimin e sulmit terrorist në Banjskë në shtator të vitit të kaluar.
Në këtë sulm mbeti i vrarë rreshteri policor, Afrim Bunjaku ndërsa në përleshjet e armatosura që pasuan, u vranë edhe tre sulmues serb.
Radoiçiq është ende i lirë në Serbi teksa nga Prokuroria Speciale në Kosovë pas 10 muajsh nga ky sulm ende nuk është ngritur aktakuzë për të dhe grupin e tij.
Gjatë një aksioni në prill, Agjencia për Administrimin e Pasurive të Sekuestruara ose të Konfiskuara e Kosovës sekuestroi dy prona të paluajtshme në Mitrovicën e Veriut, një restorant dhe një banesë, si dhe një vilë në komunën e Zubin Potokut – që të gjitha në pronësi të Radoiçiqit.