Shyqo Kalemi ishte shënjestra e atentatit në Memaliaj të Shqipërisë, mbrëmjen e së shtunës ku viktima mbetën edhe dy persona të tjerë. I plagosur rëndë mbeti Artur Kalemi, vëllai i Shyqo Kalemit, i cili ndodhej në të njëjtën tavolinë me të në lokal.
Dyshohet që vrasja të ketë qenë një hakmarrje ndaj Andrea Kalemit.
Shyqo Kalemi, është babai i Andrea Kalemit, kushëririt të Aleksandër Sadikajt të vrarë me eksploziv në Tiranë në korrik 2022.
Kalemi ka qenë i dyshuar për vrasjen e biznesmenit Edmond Papa në Tiranë në dhjetor të vitit 2022 i cili u vra për hakmarrje për vrasjen e Sadikajt.
Vetë Andrea raportohet se i ka shpëtuar dy atentateve në Greqi.
Fillimisht ai i shpëtoi një atentati në një ishull ku ishte me pushime dhe tjetri në burg kur u sulmua me thikë.
Ndërsa në janar të këtij viti në Unazën e Tiranës iu bë atentat nga një makinë në lëvizje djalit tjetër të Shyqo Kalemit, Zamir Kalemit.